تخطى المحتوى

Thursday, November 23rd, 2017

IMG_0174ثقافة حســــــــــان فديوان

                         البيظان الـــــــــــجود ولحسان

ما تهوان اعـــــلى الذوبان

ولا تهوان اعـــــــــــلى لبتلاع

معناها عنــــــــها ما تهوان

اعلى شي واگسى من شي گاع

غير إلى ما تمـــــت تنصان

اتگد اتخــــــــــاف من الضياع

واتگد اتخـــاف من النسيان

وانخاف اعلـــــــيها من لطماع

لتهـــــــــددكم يعرب حسان

يشـــــــــــــــــعاع العلم وشعاع

الدين وشـــــــــــعاع البيان

يملم أكــــــــــرم وافضل لرباع

ياللي للمـــــــــــعالي خزان

ياخر ســــــيف اللعرب واذراع

اللعرب مـــــــــاطبعو يليان

بيه الصـــــــــــــلابة في الدفاع

عن ضمان وجــود البيظان

قيم تـــــــــــــــراث آداب اطباع

ذاك اتــــاي وذوك الكيسان

والطبـــــــــــلة واجموع الرفاع

وابراد ولـــــــــــــز الشبان

ليمــــــــــــــــليان وگول البداع

للطلعة والگـــــاف وگيفان

ماهم محتـــــــــــاجين التطلاع

واگرايت فاللـــــوح القرآن

واعنايت غـــــــــــيدات التلياع

وزين الجورة بين الجيران

واداب الشـــــــــــــركة فالمتاع

والمعطى وازكــاة الحيوان

والهول الطــــــــــايب والتبراع

ماتنباع ولا يعطـــــــــــيها

حد افـــــــذاللي شاع من انواع

المعطى قيــــــــــــمنا بيها

يالبــــــــــــــــيظان ألا ما تنباع

ملحفت النيلة والتـــــــحزام

فــيزار ودراعـــــــــــــــة والثام

واگشاط وسروال اعرب تام

اخمســـــــــطعشر فالطول اذراع

وامسواك أتيـــــــــــل افلفام

والي الطـــــــرف من اور لگناع

والكحلة وانشـــــاف التبسام

واهجاف وتطـــــــــراگ وتفداع

وزين افراشــات وكبر اخيام

وزين اماعيــــــــن وزين اسراع

واتحيكي لغيود ابلريــــــــام

والصيدات وسبة لوجـــــــــــــاع

وغيد التحفال وغيد الشام

واسم العراد ابلا تشناع

والمولع بيـــــــه وحر اسقام

الگلب افجميع البقاع

عادات ولهــــــــجة ما تنسام

ولا تنصاع اخلاگ الطماع

فيها مافيـــــــــــها گاع اكلام

ما تد خل ذاك المنجاع

ماتنباع ولا يعـــــــــــــــطيها

حد افذا للي شاع من انواع

المعطى قيــــــــــــــــمنا بيها

يالبيظان الا ما تنباع

بقلم الأديب:الزعيم علال الداف

كن أول من يعلق !

التعليقات تخضع للمراجعة قبل النشر لضمان الرد عليها.